глас 8
Призираяй на землю, и творяй ю трястися, избави ны страшнаго труса прещения, Христе Боже наш, и низпосли нам богатыя милости Твоя, молит­вами Богородицы, и спаси ны.

Слава

глас 6
Избави труса тяжкаго всех нас, Господи, и язвы нестерпимыя, грех ради наших. Пощади, Господи, люди Твоя, яже стяжал еси Твоею кровию, Владыко, и град не предаждь в погибель трусом страшным, инаго бо разве Тебе Бога не вемы, и воззови поющим: Аз есмь с вами, и никтоже на вы.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.