глас 4
Исправление веры, и образ кротости, и якоже сад посреде рая, преподобными делы твоими мир просвещаеши, и сего ради к мощем твоим любовию прибегаем и верно вопием: предстани в помощь воспевающим память твою светоносную, отче Ионо, и моли спастися душам нашим.

Слава

глас 4
Свыше приял еси Божественную благодать, ходатайствовати Богу и человеком, яко архиерей возношение вознося, и мир людем твоим снося, и обилие плодов, Ионо блаженне, ты бо еси Великаго Новограда похвала, и сущих о нем радость.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.