глас 3
Апостоли святии, молите Милостиваго Бога, да прегрешений оставление подаст душам нашим.

глас 4
Правило веры и образ кротости, воздержания учителя яви тя стаду твоему яже вещей истина; сего ради стяжал еси смирением высокая, нищетою богатая. Отче священноначальниче Николае, моли Христа Бога спастися душам нашим.

глас 8
Бденными молитвами, теченьми слезными столп омочил еси, и из глуби­ны воздыханьми во сто трудов уплодоносил еси, и был еси пастырь, всем подая прощение, преподобне отче наш Лазаре: молися Христу Богу спастися душам нашим.

глас 2
Твердыя и боговещанныя проповедатели, верх апостолов Твоих, Господи, приял еси в наслаждение благих Твоих и покой; болезни бо онех и смерть приял еси паче всякаго всеплодия, Едине сведый сердечная.

глас 3
В Мирех, святе, священнодействитель показался еси: Христово бо, преподобне, Евангелие исполнив, положил еси душу твою о людех твоих и спасл еси неповинныя от смерти; сего ради освятился еси, яко великий таинник Божия благодати.

Слава

глас 4
Яко светильника превеликаго, Церковь Христова славит тя с веселием псаломски, темже не престай моляся Христу, дати всем прегрешений прощение.

И ныне

глас 8
Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.