глас 4
Яко Безплотным собеседника и страстотерпцем единовсельника, сошедшеся верою, Мино, восхваляем тя, мира мирови испроси и душам нашим велия милости.

Слава

глас 4
Воинства исхити привременнаго, и нетленнаго показа тя Небеснаго общника, страстотерпче Мино, Христос Бог наш, Иже мучеников нетленный венец.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.