глас 2
Память праведнаго с похвалами, тебе же довлеет свидетельство Господне, Предтече: показал бо ся еси воистинну и пророков честнейший, яко и в струях крестити сподобился еси Проповеданнаго. Темже и за истину пострадав радуяся, благовестил еси и сущим во аде Бога явльшагося плотию, вземлющаго грех мира и подающаго нам велию милость.

глас 4
Мученик Твой, Господи, во страдании своем венец прият нетленный от Тебе, Бога нашего, имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.

глас 2
Пророче Божий и Предтече благодати, главу твою, яко шипок священнейший, от земли обретше, исцеления всегда приемлем, ибо паки, якоже прежде, в мире проповедуеши покаяние.

Слава

глас 4
Явился еси преудивлен крепостию, всесожжения ливан благовонен себе принесл еси, жертву Христу, и венец почести приим, Варлааме, присно моли за ны, страдальче.

И ныне

глас 8
Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.