глас 4
Днесь блажат тя мира концы, Божественных чудес исполньшеся, и земля радуется, напившеся крови твоея, христоименитии же людие града Киева освящением Божественнаго храма твоего радостию возвеселишася, страстотерпче Георгие, сосуде избранный Святаго Духа, угодниче Христов. Егоже моли, с верою и мольбою приходящим во святый твой храм, дати очищение грехов, умирити мир и спасти души наша.

Слава

глас 2
Божественнаго и венценоснаго великомученика Христова Георгия, на враги победу вземшаго одоления, сошедшеся верою во освященный храм, восхвалим, егоже благоволи Бог создати во имя его, Един во святых почиваяй.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.