глас 2
Егда снизшел еси к смерти, Животе безсмертный, тогда ад умертвил еси блистанием Божества; егда же и умершия от преисподних воскресил еси, вся силы небесныя взываху: Жизнодавче, Христе Боже наш, слава Тебе.

глас 4
Аврааму в вере подражая, Иову же в терпении последуя, отче Филарете, благая земли разделял еси неимущим и лишение сих терпел еси мужественне. Сего ради светлым тя венцем увенча Подвигоположник, Христос Бог наш, Егоже моли спастися душам нашим.

глас 2
Воскресл еси от гроба, Всесильне Спасе, и ад видев чудо, ужасеся, и мертвии воссташа; тварь же видящи срадуется Тебе, и Адам свеселится, и мир, Спасе мой, воспевает Тя присно.

Слава

глас 3
Истинно всеизрядная твоя купля зрится и мудрою быти судится всеми благомудрствующими: отдал бо еси дольняя и кратковременная, взыскуя Горних и вечных. Темже и достойно стяжал еси вечную славу, милостиве Филарете.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.