глас 2
Память праведнаго с похвалами, тебе же довлеет свидетельство Господне, Предтече: показал бо ся еси воистинну и пророков честнейший, яко и в струях крестити сподобился еси Проповеданнаго. Темже и за истину пострадав радуяся, благовестил еси и сущим во аде Бога явльшагося плотию, вземлющаго грех мира и подающаго нам велию милость.

глас 2
Пророка Твоего память, Господи, празднующе, тем Тя молим: спаси души наша.

глас 2
Пророче Божий и Предтече благодати, главу твою, яко шипок священнейший, от земли обретше, исцеления всегда приемлем, ибо паки, якоже прежде, в мире проповедуеши покаяние.

Слава

глас 8
Возгласивый вселенней от юга пришествие Божие от Девы, Аввакуме богоглаголиве, и на Божественней стражи предстоянием слышания от светоносна ангела Христово Воскресение возвестил еси миру, сего ради весело зовем ти: радуйся, пророков светлая доброто.

И ныне

глас 8
Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.