глас 2
Память праведнаго с похвалами, тебе же довлеет свидетельство Господне, Предтече: показал бо ся еси воистинну и пророков честнейший, яко и в струях крестити сподобился еси Проповеданнаго. Темже и за истину пострадав радуяся, благовестил еси и сущим во аде Бога явльшагося плотию, вземлющаго грех мира и подающаго нам велию милость.

глас 7
По имени своему за труды велия и всегдашнее зде умерщвление плоти в затворе, безсмертную ныне на Небеси жизнь наследовавый, молим тя прилеж­но: молися о нас, яко да и мы тояжде сподобимся получити.

глас 2
Пророче Божий и Предтече благодати, главу твою, яко шипок священнейший, от земли обретше, исцеления всегда приемлем, ибо паки, якоже прежде, в мире проповедуеши покаяние.

Слава

глас 1
Ведый мира сего суету быти тщетну, отвратился еси ея, не ктому самима очима, но и всего себе всеконечне, преподобне, отвратив, затворился еси в темней пещере, в нейже в молитвах и слезах многовременне потруждся и обрет на Небеси безконечную радость, молися непрестанно за души наша.

И ныне

глас 8
Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.