глас 2
Память праведнаго с похвалами, тебе же довлеет свидетельство Господне, Предтече: показал бо ся еси воистинну и пророков честнейший, яко и в струях крестити сподобился еси Проповеданнаго. Темже и за истину пострадав радуяся, благовестил еси и сущим во аде Бога явльшагося плотию, вземлющаго грех мира и подающаго нам велию милость.

глас 3
Юношески процвел еси во отечествии твоем, добротою украшен, и неправедную и безвременную смерть подъял еси, Уроше всечестне; царскаго корене плод сладок, аще и не во время созрев, в Господню житницу вселился еси и жалость велию сродству твоему оставил еси. Молися о нас, творящих святую память твою.

глас 2
Пророче Божий и Предтече благодати, главу твою, яко шипок священнейший, от земли обретше, исцеления всегда приемлем, ибо паки, якоже прежде, в мире проповедуеши покаяние.

Слава

глас 6
Отрасли благородныя цвет прекрасный явился еси, Уроше всечестне, завистию бо убиен был еси от твоих присных, Божием же Духом просвещен, святороднаго племени свят был еси и, мученическим венцем увязся, в чертозе Небеснем водворяешися. Молися о нас, святе, творящих любовию память твою.

И ныне

глас 8
Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.