глас 8
Варвару святую почтим: вражия бо сети сокруши и яко птица избавися от них, помощию и оружием Креста, всечестная.

Слава

глас 4
В Троице благочестно певаемому последовавши Богу, страстотерпице, идольская притупила еси чтилища, посреде же подвига страдальчествующи, Варваро, мучителей прещения не устрашилася еси, мужемудренная, велегласно поющи присно: Троицу чту, едино Божество.

И ныне

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.