глас 4
Готовися, Вифлееме, отверзися всем Едеме, красуйся Евфрафо, яко древо Живота в вертепе процвете от Девы, рай бо Оная чрево явися мысленный, в немже Божественный сад, от негоже ядше, живы будем, не якоже Адам умрем. Христос раждается прежде падший возставити образ.

глас 4
Агница Твоя, Иисусе, зовет велиим гласом: Тебе, Женише мой, люблю, и, Тебе ищущи, страдальчествую и сраспинаюся и спогребаюся Крещению Твоему, и стражду Тебе ради, яко да царствую в Тебе, и умираю за Тя, да и живу с Тобою, но яко жертву непорочную приими мя, с любовью пожершуюся Тебе. Тоя молитвами, яко Милостив, спаси души наша.

Слава

глас 3
Девства добротами преочищена, девице, и мучения венцы, Иулиание, ныне венчавшися, даеши сущим в нуждах и недузех исцеление и спасение приступающим к раце твоей, Божественную бо благодать Христос источает и жизнь вечную.

И ныне

глас 3
Дева днесь Превечное Слово в вертепе грядет родити неизреченно; ликуй, вселенная, услышавши, прослави со ангелы и пастырьми хотящаго явитися Отроча Младо, Превечнаго Бога.