глас 6
Ангельския силы на гробе Твоем, и стрегущии омертвеша, и стояше Мария во гробе, ищущи Пречистаго Тела Твоего. Пленил еси ад, не искусився от него; сретил еси деву даруяй живот. Воскресый из мертвых, Господи, слава Тебе.

глас 4
Вознеслся еси во славе, Христе Боже наш, радость сотворивый учеником обетованием Святаго Духа, извещенным им бывшим благословением, яко Ты еси Сын Божий, Избавитель мира.

глас 4
Жития светлостию просветив твое отечество, в молитвах и постех дарова­ний Божественнаго Духа исполнился еси, и во временней сей жизни добре подвизався, милости благоутробия всем скорбящим отверзл еси и нищим был еси заступник. Тем молим тя, отче Пафнутие, моли Христа Бога, да спасет ду­ши наша.

Слава

глас 8
Божиим светолитием просвещен, отче, постническое стяжал еси жительство, преподобне, иноком предобрый наставниче и постником благое украшение. Сего ради Господь труды твоя видев, чудес даром обогати тя, источаеши бо исцеления. Мы же радующеся вопием ти: радуйся, отче Пафнутие.

И ныне

глас 6
Еже о нас исполнив смотрение, и яже на земли соединив небесным, вознеслся еси во славе, Христе Боже наш, никакоже отлучаяся, но пребывая неотступный, и вопия любящим Тя: Аз есмь с вами и никтоже на вы.