глас 6
Ангельския силы на гробе Твоем, и стрегущии омертвеша, и стояше Мария во гробе, ищущи Пречистаго Тела Твоего. Пленил еси ад, не искусився от него; сретил еси деву даруяй живот. Воскресый из мертвых, Господи, слава Тебе.

глас 4
Вознеслся еси во славе, Христе Боже наш, радость сотворивый учеником обетованием Святаго Духа, извещенным им бывшим благословением, яко Ты еси Сын Божий, Избавитель мира.

глас 8
Божественныя Бескровныя совершая Жертвы, кровь твою, от безбожных ага­рян излиянную, в жертву непорочную принесл еси Владыце твоему, Пастыреначальнику Христу. Егоже моли, молим тя, пролити гнев на языки, хотящия браней, христолюбивое воинство наше на враги укрепи и стадо твое от всяких бед неврежденно соблюди. Тебе бо крепкаго заступника почитаем, новый свя­щенномучениче российский, святителю блаженне Макарие.

Слава

глас 8
Веселится град Киев, великое сокровище стяжав, твое тлению непричастное тело, святителю блаженне Макарие, твой бо престол даже до крове от лютых врагов нашествия хранил еси. И ныне Небесному предстоиши престолу, идеже молитвенно пред Творцем поминай нас, отче наш, да во всех бедах имеем тя прибежище и тобою хвалимся, зовуще: радуйся, Макарие, архиереом честное украшение.

И ныне

глас 6
Еже о нас исполнив смотрение, и яже на земли соединив небесным, вознеслся еси во славе, Христе Боже наш, никакоже отлучаяся, но пребывая неотступный, и вопия любящим Тя: Аз есмь с вами и никтоже на вы.