глас 6
Ангельския силы на гробе Твоем, и стрегущии омертвеша, и стояше Мария во гробе, ищущи Пречистаго Тела Твоего. Пленил еси ад, не искусився от него; сретил еси деву даруяй живот. Воскресый из мертвых, Господи, слава Тебе.

глас 4
Вознеслся еси во славе, Христе Боже наш, радость сотворивый учеником обетованием Святаго Духа, извещенным им бывшим благословением, яко Ты еси Сын Божий, Избавитель мира.

глас 1
Равночислении Троицы Несозданныя суще, с лики Ангелов и чины мучеников предстоите вы, радующеся, Пре­столу Божества, мудрии. Сего ради при­частием сияние отонуду приемлюще, источник исцелений верным подаете и Божественное просвещение, мучениче Христов Евфимие со Игнатием мудрым и с Божественным Акакием, о нас прис­но молитеся.

Слава

глас 4
Явися днесь Церкви новое торжество триех страстотерпцев, яко светила, озаряющее православных, Христе, исполнения.

И ныне

глас 6
Еже о нас исполнив смотрение, и яже на земли соединив небесным, вознеслся еси во славе, Христе Боже наш, никакоже отлучаяся, но пребывая неотступный, и вопия любящим Тя: Аз есмь с вами и никтоже на вы.