глас 4
Готовися, Вифлееме, отверзися всем Едеме, красуйся Евфрафо, яко древо Живота в вертепе процвете от Девы, рай бо Оная чрево явися мысленный, в немже Божественный сад, от негоже ядше, живы будем, не якоже Адам умрем. Христос раждается прежде падший возставити образ.

глас 2
Велия веры исправления, во источнице пламене, яко на воде упокоения, святие трие, отроцы радовахуся, и пророк Даниил львом пастырь, яко овцам, являшеся. Тех молитвами, Христе Боже, спаси души наша.

Слава

глас 1
Веселися, Вифлееме, Ефрафо, готовися: се бо Агница, Пастыря великаго во утробе носящи, еже родити тщится, Егоже зряще, Богоноснии отцы веселятся, с пастырьми поюще Деву доящую.

И ныне

глас 3
Дева днесь Превечное Слово в вертепе грядет родити неизреченно; ликуй, вселенная, услышавши, прослави со ангелы и пастырьми хотящаго явитися Отроча Младо, Превечнаго Бога.