глас 4
Готовися, Завулоне, и красуйся, Неффалиме, Иордане реко, стани, подыми, взыграя, креститися грядуща Владыку; веселися, Адаме с праматерию, не крыйта себе, якоже в раи прежде, ибо, наги видев вы явися, да облечет в первую одежду. Христос явися, всю тварь хотя обновити.

глас 3
Вышняго повелением, тученосным облаком небо помрачившим, и молни­ям блистающим, грому же возшумевшу с прещением, испустил еси душу твою в руце Господеви, премудре Артемие, и ныне предстоиши Престолу Владыки всех, о иже верою и любовию приходя­щим к тебе, подая исцеление всем нео­тложно и моляся Христу Богу спастися душам нашим.

глас 4
Днесь светло красуется обитель сия, яко зарю солнечную восприимши, Владычице, чудотворную Твою икону, к ней же ныне мы притекающе и молящеся, Тебе взываем сице: о, пречудная Владычице Богородице, молися из Тебе воплощенному Христу Богу нашему, да избавит обитель сию и вся грады и страны христианския невредимы от всех навет вражиих, и спасет души наши, яко Милосерд.

глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти, ускори на молитву, и потщися на умоление, предстательствующи присно, Богородице, чтущих Тя.

Слава

глас 8
Возсия днесь пресветлая память премудраго Артемия, богоданная благодать, яко река, изливает от святоцелебныя раки мощей его дивная исцеления, имиже от многоразличных недуг избавляемся, с верою приемлюще я, и взывающе: радуйся, Артемие Богомудре.

И ныне

глас 4
Во струях днесь Иорданских быв, Господь Иоанну вопиет: не убойся крестити Мя, спасти бо приидох Адама первозданнаго.